📜 លោកជំទាវ អ្នកឧកញ៉ា ម៉ៅ ចំណាន គិត ម៉េង ប្រគេនទេយ្យទាន បង្សុកូល ផ្សាយមេត្តាធម៌ និងរាប់បាត្រព្រះសង្ឃ តាជី យាយជី ឧទ្ទិសមហាកុសលជូនវីរកងទ័ព ពលីជីវិតក្នុងបុព្វហេតុជាតិមាតុភូមិ

ភ្នំពេញ៖ នៅថ្ងៃទី៩ ខែវិច្ឆិកា ឆ្នាំ២០២៥ លោកជំទាវ អ្នកឧកញ៉ា ម៉ៅ ចំណាន គិត ម៉េង ប្រធានសមាគមសិល្បករខ្មែរ បាននិមន្តព្រះសង្ឃចំនួន ៩ អង្គ ប្រារព្ធពិធីប្រគេនទេយ្យទាន បង្សុកូល ផ្សាយមេត្តាធម៌ និងរាប់បាត្រព្រះសង្ឃ តាជី និងយាយជី ដើម្បីឧទ្ទិសមហាកុសលជូនវិញ្ញាណក្ខន្ធវីរកងទ័ព ដែលបានបូជាពលីជីវិតក្នុងបុព្វហេតុការពារជាតិមាតុភូមិ។

ក្នុងឱកាសដ៏សក្ការ្យសិទ្ធិនេះ លោកជំទាវ អ្នកឧកញ៉ា ម៉ៅ ចំណាន គិត ម៉េង មានទឹកចិត្តសទ្ធាជ្រះថ្លាដ៏ខ្ពង់ខ្ពស់ បានដឹកនាំសិល្បករ និងសិល្បការិនីប្រមាណជាង ៤០រូប រៀបចំកម្មវិធីចម្រើនបដិបត្តិ សមាធិវិបស្សនាកម្មដ្ឋាន និងអញ្ជើញសិក្សា បដិបត្តិសមថ និងវិបស្សនាកម្មដ្ឋាន នៅពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា ស្ថិតនៅភូមិភ្នំ ឃុំផ្សារដែក ស្រុកពញាឮ ខេត្តកណ្តាល រយៈពេល ៣ថ្ងៃ (ចាប់ពីថ្ងៃទី៧ ដល់ថ្ងៃទី៩ ខែវិច្ឆិកា ២០២៥)។

សូមឱ្យកិច្ចប្រណិប័តន៍ ត្រៃសិក្ខា (សីល សមាធិ បញ្ញា) ក្នុងធម្មវិន័យដ៏ផូរផង់នេះ បានកើតមានផលដល់សេចក្តីជឿ និងសេចក្តីសន្មត់របស់ពុទ្ធបរិស័ទទូទាំងពិភពលោក។ សូមឱ្យវុឌ្ឍិធម៌ វឌ្ឍនធម៌ និងសាសនប្បដិបត្តិ តាំងនៅជានិរន្តរ៍ និងឱ្យវិញ្ញាណក្ខន្ធវីរកងទ័ពទាំងអស់ បានអនុមោទនាអានិសង្សបុណ្យដ៏ធម៌នេះ។

ដោយឡែក នៅថ្ងៃទី៩ ខែវិច្ឆិកា ដែលជាថ្ងៃចុងបញ្ចប់នៃការបដិបត្តិចម្រើនសមាធិវិបស្សនាកម្មដ្ឋាន សមាគមសិល្បករខ្មែរ ដែលដឹកនាំដោយលោកជំទាវ អ្នកឧកញ៉ា ម៉ៅ ចំណាន គិត ម៉េង ក៏បានរៀបចំពិធីរាប់បាត្រ និងនិមន្តព្រះសង្ឃចំនួន៩ អង្គ ក្រោមអធិបតីភាពដ៏ខ្ពង់ខ្ពស់របស់ ព្រះសាសនមុនី មហាកម្មដ្ឋានាចរិយ ហ៊ឹម ប៊ុនធឿន ធម្មត្ថេរោ ព្រះរាជាគណថ្នាក់ទោ គណមហានិកាយ សមាជិកថេរៈសភាសង្ឃជាន់ខ្ពស់នៃព្រះពុទ្ធសាសនាកម្ពុជា ជាឧត្តមទីប្រឹក្សាគណៈសង្ឃនាយក និងជាប្រធានពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា។

ពិធីនេះបានប្រារព្ធធ្វើឡើង ដើម្បីឧទ្ទិសមហាកុសលជូនវិញ្ញាណក្ខន្ធវីរកងទ័ព ដែលបានបូជាពលីជីវិតក្នុងបុព្វហេតុការពារជាតិមាតុភូមិ តាំងពីសម័យមហានគរ រហូតដល់សម័យបច្ចុប្បន្ន ជាពិសេសវីរកងទ័ពដែលបានពលីក្នុងសង្គ្រាមទល់ដែនរយៈពេលប្រាំថ្ងៃថ្មីៗនេះ។

សូមឱ្យពុទ្ធសាសនាធម៌បានបន្តរីកចម្រើន និងសូមឱ្យមនុស្សលោកទទួលបានសុភមង្គលក្នុងសេចក្តីសន្តិភាព និងមេត្តាករុណា៕