រាជរដ្ឋាភិបាល និងវិស័យឯកជន កំពុងដើរទន្ទឹមគ្នា ដើម្បីឈានសម្រេចចក្ខុវិស័យកម្ពុជា ឆ្នាំ២០៥០
រាជរដ្ឋាភិបាល និងវិស័យឯកជន ឥឡូវនេះកំពុងធ្វើការជាមួយគ្នាយ៉ាងជិតស្និទ ក្នុងការដោះស្រាយបញ្ហាប្រឈម បង្កើនការធ្វើពិពិធកម្មសេដ្ឋកិច្ច និងលើកកម្ពស់វិស័យគាំទ្រសំខាន់ៗ ដើម្បីជំរុញឱ្យកម្ពុជាឈានដល់ការសម្រេចចក្ខុវិស័យឆ្នាំ ២០៥០ ក្នុងនាមជាប្រទេសមានចំណូលខ្ពស់។
ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា បានលើកឡើងក្នុងកិច្ចសម្ភាសន៍ពាក់ព័ន្ធនឹងការអនុវត្តចក្ខុវិស័យ ២០៥០ នៅក្នុងសិក្ខាសាលាផ្សព្វផ្សាយរបាយការណ៍វឌ្ឍនភាពនៃវិធានការកែទម្រង់មុតស្រួច ជាកញ្ចប់ ដែលប្រព្រឹត្តិចេញពេលវេទិការាជរដ្ឋាភិបាល–ផ្នែកឯកជន លើកទី១៩ ប្រចាំឆមាសទី១ ឆ្នាំ២០២៥ ថា ក្រោមការដឹកនាំរបស់សម្តេចធិបតីនាយករដ្ឋមន្ត្រី រាជរដ្ឋាភិបាលបានផ្ដោតលើការលើកកម្ពស់តួនាទីវិស័យឯកជន តាមរយៈការលើកកម្ពស់សហគ្រិនភាព និងការពង្រឹងសមត្ថភាពប្រកបដោយប្រសិទ្ធភាព ដើម្បីក្លាយជាម៉ាស៊ីនចលករសំខាន់ក្នុងការអភិវឌ្ឍសង្គម–សេដ្ឋកិច្ចជាតិ។
ឯកឧត្តមបញ្ជាក់ថា ដើម្បីឈានទៅសម្រេចចក្ខុវិស័យ ២០៥០ កម្ពុជាត្រូវបន្តធ្វើពិពិធកម្មសេដ្ឋកិច្ច ដោយទាក់ទាញវិនិយោគថ្មីៗលើវិស័យអេឡិចត្រូនិច ឧស្សាហកម្មយានយន្ត ការកែច្នៃកសិ–ឧស្សាហកម្ម និងវិស័យបច្ចេកវិទ្យាផ្សេងៗ។ “ប្រសិនបើកម្ពុជានៅត្រឹមតែឧស្សាហកម្មកាត់ដេរ សម្លៀកបំពាក់ កាបូប និងស្បែកជើង ការឈានទៅសម្រេចចក្ខុវិស័យឆ្នាំ២០៥០ នឹងមានភាពលំបាកខ្លាំង” ឯកឧត្តមថ្លែង។
ផ្នែកវិស័យឯកជន អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងប្រធានគណៈកម្មាធិការសម្របសម្រួលវិស័យឯកជន ក៏បានលើកឡើងថា កម្ពុជា ត្រូវការការកែទម្រង់ជាច្រើន ជាពិសេសបទបញ្ជា និងនីតិវិធីពាក់ព័ន្ធនឹងការបំពេញឯកសារ ការធ្វើពាណិជ្ជកម្ម និងការស្របច្បាប់ក្នុងការចាប់ផ្តើមអាជីវកម្ម។ ការកែលម្អเหล่านี้ រួមជាមួយកត្តាផ្សេងៗទៀត គឺជាគន្លឹះដើម្បីទាក់ទាញវិនិយោគថ្មី និងជំរុញកំណើនសេដ្ឋកិច្ចឱ្យរហ័សជាងមុន។
តាមយុទ្ធសាស្ត្របញ្ចាកោណ ដំណាក់កាលទី១ ដែលសម្លឹងទៅមុខរយៈពេល២៥ឆ្នាំ កម្ពុជាត្រូវអនុវត្តយុទ្ធសាស្ត្រដោយមានភាពប្រទាក់ក្រឡា ក្តោបក្តាប់ និងមានចក្ខុវិស័យច្បាស់លាស់ ដើម្បីកសាងឱ្យប្រទេសក្លាយជាអរិយប្រទេស។ ចក្ខុវិស័យនេះរួមមាន៖ កម្ពុជាជាសង្គមរស់រវើក មានចំណូលខ្ពស់ និងមានកម្រិតធន់នឹងបញ្ហាប្រឈម; ប្រជាជនមានចំណេះដឹងខ្ពស់ និងជំនាញមួយយ៉ាងតិចប្រចាំជីវិត; រាល់ប្រជាពលរដ្ឋរស់នៅក្នុងសុភមង្គល សីលធម៌ ស្មើសិទ្ធិ ស្មើឱកាស; និងកម្ពុជាគឺជាប្រទេសដែលមានបរិស្ថានធម្មជាតិរឹងមាំ មានតុល្យភាព និងប្រកបដោយសុខដុមភាពរវាងការអភិវឌ្ឍ និងការអភិរក្សធនធានធម្មជាតិ។
ដោយ៖ ហុក វិបុល
