ឯកឧត្តម អ៊ី ឈាន និងលោកជំទាវ បាន ស្រីមុំ ផ្តល់រថយន្ត ៣ គ្រឿង ទោចក្រយានយន្ត ២១ គ្រឿង សម្ភារៈបរិក្ខា និងស្បៀងអាហារ ជូនកងកម្លាំងជួរមុខ និងកម្លាំងអន្តរាគមន៍ ខេត្តប៉ៃលិន
( ដោយ៖ អ៊ុក ទូច )
ប៉ៃលិន៖ រសៀលថ្ងៃទី១៤ ខែវិច្ឆិកា ឆ្នាំ២០២៥ ឯកឧត្តម អ៊ី ឈាន ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តប៉ៃលិន អមដំណើរដោយ លោកជំទាវបណ្ឌិត បាន ស្រីមុំ អភិបាលខេត្តប៉ៃលិន ព្រមទាំងក្រុមការងារ បានអញ្ជើញសំណេះសំណាល សួរសុខទុក្ខ និងលើកទឹកចិត្តដល់កងកម្លាំងជួរមុខ និងកម្លាំងអន្តរាគមន៍ ដែលកំពុងបំពេញបេសកកម្មការពារបូរណភាពទឹកដីតាមបន្ទាត់ព្រំដែន។
ឯកឧត្តម និងលោកជំទាវ បានប្រគល់អំណោយរួមមាន៖
- រថយន្ត ០៣ គ្រឿង
- ទោចក្រយានយន្ត ២១ គ្រឿង
- សម្ភារៈបរិក្ខា ថវិកា និងស្បៀងអាហារ
អំណោយទាំងនេះ ត្រូវប្រគល់ជូនដល់អង្គភាពកងកម្លាំងជួរមុខ និងកម្លាំងចល័តអន្តរាគមន៍គ្រប់អង្គភាព នៃកងកម្លាំងចម្រុះ គណៈបញ្ជាការខេត្តប៉ៃលិន។
ប្រសាសន៍សំខាន់ពីឯកឧត្តម អ៊ី ឈាន
ឯកឧត្តមទេសរដ្ឋមន្ត្រី បានផ្សព្វផ្សាយនូវសារអានុភាព និងការសួរសុខទុក្ខពី
- សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា
- សម្តេចកិត្តិព្រឹទ្ធបណ្ឌិត ប៊ុន រ៉ានី ប្រធានកាកបាទក្រមកម្ពុជា
- សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី
ជូនដល់នាយទាហាន នាយទាហានរង និងពលទាហានទាំងអស់ ដែលកំពុងឈរជើងការពារបូរណភាពទឹកដីតាមបន្ទាត់ព្រំដែនក្នុងភូមិសាស្ត្រខេត្តប៉ៃលិន និងកម្លាំងចល័តអន្តរាគមន៍គ្រប់អង្គភាព។
ឯកឧត្តមបានលើកឡើងថា ទោះបីសម្តេចមិនអាចមកជួបដោយផ្ទាល់ក្តី ក៏នៅតែមានការចងក្រង ក្តៅក្រហាយចំពោះកងកម្លាំងជានិច្ច។
ស្ថានភាពតាមបន្ទាត់ព្រំដែន
ឯកឧត្តមបានបញ្ជាក់ថា ស្ថានភាពតាមបន្ទាត់ព្រំដែន កម្ពុជា–ថៃ ក្នុងខេត្តប៉ៃលិន កំពុងមានភាពធម្មតា ស្ងប់ស្ងាត់ និងគ្មានការកើនឡើងកម្តៅ ដូចខេត្តព្រះវិហារ ឧត្តរមានជ័យ និងបន្ទាយមានជ័យឡើយ។ កងកម្លាំងប្រដាប់អាវុធបានបន្តរក្សាវិន័យខ្ពស់ រង់ចាំបទបញ្ជាផ្លូវការពីមេបញ្ជាការ និងប្រមុខរាជរដ្ឋាភិបាល ដោយត្រៀមខ្លួនពេញទំហឹងសម្រាប់បេសកកម្មបម្រើជាតិ និងប្រជាជន។
ការលើកទឹកចិត្ត និងវាយតម្លៃខ្ពស់
ក្នុងឱកាសនេះ ឯកឧត្តម អ៊ី ឈាន បានកោតសរសើរ និងវាយតម្លៃខ្ពស់ចំពោះសមិទ្ធផលទាំងឡាយរបស់កងកម្លាំង ដែលទទួលខុសត្រូវការពារជាតិ និងសន្តិសុខសណ្តាប់ធ្នាប់។
គាត់បានបង្ហាញការកោតសរសើរចំពោះវីរភាពអង់អាច ក្លាហាន ស្មោះត្រង់ និងការលះបង់របស់កងទ័ព ក្នុងការអភិវឌ្ឍហេដ្ឋារចនាសម្ព័ន្ធ និងធនធានសេដ្ឋកិច្ច ដើម្បីលើកកម្ពស់ជីវភាពកងទ័ព និងគ្រួសារ។
សមិទ្ធផលទាំងនេះ នឹងក្លាយជាកេរ្តិ៍ដំណែលសម្រាប់ជំនាន់ក្រោយ ក្នុងបេសកកម្មការពារអធិបតេយ្យ និងបូរណភាពទឹកដីជារឿយៗ។
ដោយ៖ អ៊ុក ទូច
