ខេត្តប៉ៃលិនចូលរួមកិច្ចប្រជុំពិសេសគណៈកម្មការចម្រុះខណ្ឌសីមាព្រំដែនគោក (JBC) កម្ពុជា-ថៃ នៅខេត្តចន្ទបុរី§
(ចន្ទបុរី, ថៃ)៖ ថ្ងៃទី២២ ខែតុលា ឆ្នាំ២០២៥ – លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន បានអញ្ជើញចូលរួមកិច្ចប្រជុំពិសេសដ៏សំខាន់របស់គណៈកម្មការចម្រុះខណ្ឌសីមាព្រំដែនគោក (JBC) រវាងព្រះរាជាណាចក្រកម្ពុជា និងព្រះរាជាណាចក្រថៃ នៅខេត្តចន្ទបុរី ប្រទេសថៃ។
កិច្ចប្រជុំនេះត្រូវបានដឹកនាំដោយ៖
- ឯកឧត្តម ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន និងជាប្រធានគណៈកម្មការចម្រុះព្រំដែនកម្ពុជា-ថៃ។
- ឯកឧត្តម Prasas Prasasvinitchai ទីប្រឹក្សាក្រសួងការបរទេស និងជាប្រធានគណៈកម្មការចម្រុះព្រំដែនថៃ-កម្ពុជា។
ការចូលរួមរបស់លោកជំទាវបណ្ឌិតអភិបាលខេត្តប៉ៃលិន ក្នុងនាមជាអាជ្ញាធរដែនដី ដែលមានព្រំដែនជាប់ជាមួយប្រទេសថៃ គឺមានសារៈសំខាន់ណាស់ក្នុងការរួមចំណែកផ្តល់នូវទិន្នន័យជាក់ស្តែង និងផ្លាស់ប្តូរទស្សនៈយល់ឃើញនានាពាក់ព័ន្ធនឹងកិច្ចការព្រំដែន។
កិច្ចប្រជុំពិសេសនេះបានពិភាក្សាលើរបៀបវារៈសំខាន់ៗសំដៅជំរុញ និងពន្លឿនការងារកំណត់បង្គោលព្រំដែនគោក ដែលមិនទាន់បញ្ចប់នៅឡើយ រួមទាំងការដោះស្រាយបញ្ហាប្រឈមនានាតាមខ្សែបន្ទាត់ព្រំដែន ដើម្បីរក្សាបាននូវ សន្តិភាព ស្ថិរភាព និងកិច្ចសហប្រតិបត្តិការ ដ៏ល្អប្រសើររវាងប្រទេសទាំងពីរ ស្របតាមគោលការណ៍កិច្ចព្រមព្រៀងដែលបានចុះហត្ថលេខារួចមកហើយ។
តាមរយៈកិច្ចប្រជុំនេះ ភាគីទាំងពីរបានប្តេជ្ញាចិត្តរួមគ្នាពង្រឹងកិច្ចសហប្រតិបត្តិការលើគ្រប់វិស័យ ដើម្បីប្រែក្លាយតំបន់ព្រំដែនឱ្យក្លាយទៅជា ព្រំដែនសន្តិភាព និងការអភិវឌ្ឍ ប្រកបដោយចីរភាព សម្រាប់ផលប្រយោជន៍ទៅវិញទៅមកនៃប្រជាជននៃប្រទេសទាំងពីរ។
ចប់
ចេញផ្សាយដោយ៖ (អ៊ុក ទូច) ពន្លឺព្រះធម៌
www.plpt.net កាលបរិច្ឆេទ៖ ថ្ងៃទី២៣ ខែតុលា ឆ្នាំ២០២៥
