កិច្ចប្រជុំពិសេស JBC ថ្ងៃទី១ ត្រូវបានសម្រាក ហើយនឹងបន្តនៅថ្ងៃស្អែក
(ចន្ទបុរី, ថៃ)៖ កិច្ចប្រជុំពិសេសគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ (JBC) ថ្ងៃទី១ ដែលធ្វើឡើងនាវេលា១២ថ្ងៃត្រង់ ថ្ងៃទី២១ ខែតុលា ឆ្នាំ២០២៥នេះ ត្រូវបានសម្រាកហើយនៅវេលាម៉ោងប្រមាណជិត៥៖៣០នាទី ហើយកិច្ចប្រជុំនឹងចាប់ផ្តើមនៅព្រឹកថ្ងៃទី២២ ខែតុលា ឆ្នាំ២០២៥ជាបន្តទៀត។
កម្ពុជា និងថៃ កំពុងពើបប្រទះបញ្ហាដ៏ស្មុគស្មាញពាក់ព័ន្ធនឹងព្រំដែនរវាងប្រទេសទាំងពីរ។ បញ្ហាដ៏ស្មុគស្មាញនេះបានបង្កឱ្យបរិយាកាសនៃការជជែកលើបញ្ហាព្រំដែនក្នុងកិច្ចប្រជុំត្រូវជួបការលំបាកជាច្រើនផងដែរ ដែលទាមទារឱ្យការជជែកត្រូវមានបត់បែន និងប្រយ័ត្នប្រយែងខ្ពស់បំផុតរាប់ចាប់ពីការប្រើប្រាស់ពាក្យសម្តីមួយមាត់ៗឡើងទៅ។
កិច្ចប្រជុំនៅថ្ងៃនេះ ក្រៅពីកិច្ចប្រជុំពេញអង្គដែលជាកិច្ចប្រជុំទូលាយហើយនោះ គេក៏ឃើញមានកិច្ចប្រជុំចង្អៀតផង។ កិច្ចប្រជុំពេញអង្គ ជាកិច្ចប្រជុំដែលមានការចូលរួមពីភាគីពាក់ព័ន្ធដូចជាមន្ត្រីមហាផ្ទៃ មន្ត្រីការពារជាតិ និងថ្នាក់ដឹកនាំបណ្តាខេត្តជាប់ព្រំដែន។ ដោយឡែកកិច្ចប្រជុំចង្អៀតត្រូវបានធ្វើឡើងតទល់គ្នារវាងលោក ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន និងជាប្រធានគណៈកម្មការចម្រុះព្រំដែនកម្ពុជា-ថៃ និងលោក Prasas Prasasvinitchai ទីប្រឹក្សាក្រសួងការបរទេស និងជាប្រធានគណៈកម្មការចម្រុះព្រំដែនថៃ-កម្ពុជា។ កិច្ចប្រជុំចង្អៀតនេះ គឺជាការជជែកលក្ខណៈពិសេស ដើម្បីទម្លុះទម្លាយបញ្ហាដែលតានតឹងខ្លាំង ឬនិយាយពីលក្ខណៈបច្ចេកទេសនៃការប្រើពាក្យពេចន៍នានានៅក្នុងសេចក្តីថ្លែងការណ៍រួមជាដើម។
សូមបញ្ជាក់ថា កិច្ចប្រជុំពិសេស JBC រយៈពេលពីរថ្ងៃនេះ នឹងពិភាក្សាលើរបៀបវារៈសំខាន់ៗចំនួន២រួមមាន៖
១) ពិនិត្យ និងតាមដានវឌ្ឍនភាពកិច្ចប្រជុំ JBC លើកទី៦ នៅភ្នំពេញ ដែលបានធ្វើឡើងកាលពីថ្ងៃទី១៤-១៥ ខែមិថុនា ឆ្នាំ២០២៥
២) ពិភាក្សាលើលទ្ធផលនៃកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅកម្ពុជា-ថៃ (GBC) នៅខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២៥។
តាមរយៈកិច្ចប្រជុំពិសេសគណៈកម្មការចម្រុះខណ្ឌសីមាព្រំដែនគោកកម្ពុជា-ថៃ រយៈពេលពីរថ្ងៃនេះ ជាការបង្ហាញនូវកិច្ចប្រឹងប្រែងបន្ថែមទៀតក្នុងការដោះស្រាយបញ្ហាព្រំដែនរវាងកម្ពុជា-ថៃ។ កម្ពុជា និងថៃ ដែលជាអ្នកជិតខាងនឹងគ្នារាប់រយឆ្នាំមកហើយនោះ មិនអាចសាងភាពសុខសាន្ត ហើយជម្លោះនឹងនៅតែកើតមាន ដរាបណាបញ្ហាមិនត្រូវបានដោះស្រាយ ឬខណ្ឌសីមាប្រទេសទាំងពីរមិនត្រូវបានកំណត់ឱ្យបានច្បាស់លាស់៕
